«
Sui-je, sui-je, sui-je belle ?
Il me semble, à mon avis,
Que j’ay beau front et doulz viz,
Et la bouche vermeillette ;
Dictes moy se je sui belle.
J’ay vers yeulx, petit sourcis,
Le chief blont, le nez traitis,
Ront menton, blanche gorgette ;
Sui-je, sui-je, sui-je belle ? etc.
J’ay dur sain et hault assis,
Lons bras, gresles doys aussis,
Et, par le faulx, sui greslette ;
Dictes moy se je sui belle.
J’ay piez rondes et petiz,
Bien chaussans, et biaux habis,
Je sui gaye et foliette ;
Dictes moy se je sui belle.
J’ay mantiaux fourrez de gris,
J’ay chapiaux, j’ay biaux proffis,
Et d’argent mainte espinglette ;
Sui-je, sui-je, sui-je belle ?
J’ay draps de soye, et tabis,
J’ay draps d’or, et blanc et bis,
J’ay mainte bonne chosette ;
Dictes moy se je sui belle.
Que quinze ans n’ay, je vous dis ;
Moult est mes trésors jolys,
S’en garderay la clavette ;
Sui-je, sui-je, sui-je belle ?
Bien devra estre hardis
Cilz, qui sera mes amis,
Qui ora tel damoiselle ;
Dictes moy se je sui belle ?
Et par Dieu, je li plevis,
Que très loyal, se je vis,
Li seray, si ne chancelle ;
Sui-je, sui-je, sui-je belle ?
Se courtois est et gentilz,
Vaillans, apers, bien apris,
Il gaignera sa querelle ;
Dictes moy se je sui belle.
C’est uns mondains paradiz
Que d’avoir dame toudiz,
Ainsi fresche, ainsi nouvelle ;
Sui-je, sui-je, sui-je belle ?
Entre vous, acouardiz,
Pensez à ce que je diz ;
Cy fine ma chansonnelle ;
Sui-je, sui-je, sui-je belle ?